خلیفه سراج‌الدین حقانی، سرپرست وزارت امور داخله کشور از شهروندان افغان مقیم در کشورهای خارجی خواسته که به وطن برگردند و در آبادی کشور، سهیم شوند.
آقای حقانی این مطلب را امروز (پنج‌شنبه، ۳ حوت) در مراسم فراغت شماری از یتیمان از دارالایتام مرکزی ولایت خوست، بیان کرده است.
سرپرست وزارت امور داخله در این مراسم به شهروندان افغان مقیم در کشورهای خارجی اطمینان داده که سر و مال آنان در حاکمیت امارت اسلامی، محفوظ خواهد بود.
خلیفه سراج‌الدین حقانی در ادامه صحبت‌هایش گفته است که بربنیاد هدایت عالیقدر امیرالمؤمنین حفظه‌الله، برای همه ایتام در کشور رسیدگی می‌شود.
آقای حقانی تاکید کرده که عالیقدر امیرالمؤمنین حفظه‌الله دستور داده تا ایتام مجاهدین امارت اسلامی و نظامیان اداره پیشین به‌گونه یک‌سان مورد نوازش قرار داده شوند.
پس از حاکمیت امارت اسلامی در کشور، امور رسیدگی به ایتام در دارالایتام‌ها و پرورشگاه‌ها، افزایش یافته است.