بختیار سعیدوف، وزیر امور خارجه اوزبیکستان که در راس هیات عالی‌رتبه این کشور به افغانستان سفر کرده با خلیفه سراج‌الدین حقانی، سرپرست وزارت امور داخله کشور، دیدار کرده است.
وزارت امور داخله با نشر خبرنامه‌ای امروز (چهارشنبه، ۲۳ حوت) از دیدار آقای سعیدوف و آقای حقانی، خبر داده است.
بربنیاد خبرنامه، دو طرف در مورد روابط دوجانبه اوزبیکستان و افغانستان، مشترکات فرهنگی و تاریخی و پروژه‌های اقتصادی گفت‌وگو کرده‌اند.
بختیار سعیدوف، وزیر امور خارجه اوزبیکستان تلاش‌های امارت اسلامی را در راستای تامین امنیت، مبارزه با مواد مخدر و ثبات در منطقه، ستایش کرده است.
گفتنی‌است که هیات کشور اوزبیکستان در سفر به افغانستان با رییس‌الوزرا معاونان اقتصادی و اداری ریاست‌الوزرا و سرپرست وزارت امور خارجه نیز دیدارهای جداگانه داشته است.