مسوولان محلی ولایت پروان می‌گویند، به هدف همدردی و کمک به سیلاب‌زدگان تیم‌های صحی را به ولایت بغلان اعزام کرده‌اند.
حکمت‌الله شمیم، سخنگوی والی پروان صبح امروز (شنبه، ۲۲، ثور) در صحبت با رادیو امید از اعزام تیم‌های کمکی در بخش صحت به ولایت بغلان، خبر داده است.
آقای شمیم می‌افزاید، یک تیم ۳۰ نفره داکتران که در راس آن معاون ریاست صحت عامه ولایت پروان قرار دارد، به ولایت بغلان رسیده‌اند.
به گفته سخنگوی والی پروان همراه با این تیم ۳۰ نفره شش عراده ادویه مورد نیاز نیز به بغلان فرستاده شده است.
حکمت‌الله شمیم تاکید می‌کند که تیم‌های یادشده تا زمانی که نیاز باشد در ولایت بغلان و در خدمت آسیب‌دیدگان سیلاب قرار خواهند داشت.
گفتنی‌است که سرازیر شدن سیلاب در ولایت بغلان جان ده‌ها تن را گرفته و ده‌ها تن دیگر، را زخمی کرده است. هنوز آمار مجموعی قربانیان این سیلاب به‌گونه دقیق معلوم نیست.