وزارت صنعت و تجارت می‌گوید، نوراالدین عزیزی، سرپرست این وزارت با رستم مینی‌خانوف، رییس جمهور تاتارستان، دیدار کرده است.
این وزارت در خبرنامه‌ای از دیدار آقای عزیزی با آقای مینی خانوف، خبر داده است.
بربنیاد خبرنامه، این دیدار در حاشیه نشست فورم بین‌المللی اقتصادی روسیه و جهان اسلام که در جمهوری تاتارستان در حال برگزاری است، صورت گرفته است.
در این دیدار در پیوند به روابط تجاری دو جانبه، سفر آقای مینی‌خانوف به کابل، ایجاد اتاق تجارت روسیه در کابل، انتقال آب، سرمایه‌گذاری در تولید برق و آغاز گام‌های عملی مبنی‌بر انتقال اموال صادراتی روسیه به افغانستان از مسیر کشورهای آسیای مرکزی، گفت‌وگو شده است.
در دیدار سرپرست وزارت صنعت و تجارت با رییس جمهور تاتارستان، دیمیتری ولواج، معاون وزارت توسعه اقتصادی روسیه و اولیگ کور بچینکوف، وزیر صنعت و تجارت تاتارستان نیز حضور داشته‌اند.
جمهوری تاتارستان تا ۱۹ ماه جاری میلادی، میزبان نشست فورم بین‌المللی اقتصاد روسیه و جهان اسلام است. در این نشست هیاتی با رهبری نورالدین عزیزی، سرپرست وزارت صنعت و تجارت کشور نیز اشتراک کرده است.