وزارت امور داخله می‌گوید، روند نصب کمره‌های امنیتی در شهر چاریکار، مرکز ولایت پروان، آغاز شده است.
مفتی عبدالمتین قانع، سخنگوی وزارت امور داخله از آغاز روند نصب کمره‌های امنیتی در مرکز پروان، امروز (سه‌شنبه، ۸ جوزا) در ایکس، خبر داده است.
آقای قانع هدف از نصب کمره‌ها در شهر چاریکار را تامین هرچه بیشتر و بهتر امنیت در ولایت پروان عنوان کرده است.
سخنگوی وزارت امور داخله افزوده که این اقدام بربنیاد پیشنهاد معینیت امور تامیناتی صورت گرفته و قرار است در نتیجه تلاش‌های ریاست عمومی مخابره صدها پایه کمره امنیتی نصب شود.
مفتی عبدالمتین قانع، نصب کمره‌های امنیتی را بخشی از استراتیژی پنج‌ساله وزارت امور داخله بیان کرده است. گفتنی‌است که روند نصب کمره‌های امنیتی به هدف تامین امنیت از شهر کابل آغاز شد.