شیخ حبیب‌الله آغا و شیخ ندا محمد ندیم، سرپرست وزیران معارف و تحصیلات عالی در حاشیه دومین نشست بین‌المللی روسیه با وزیران معارف و تحصیلات عالی، با علمای تاتارستان، دیدار کرده‌اند.
وزارت تحصیلات عالی با نشر خبرنامه‌ای از دیدار این سرپرست وزیران امارت اسلامی با علمای تاتارستان، خبر داده است.
در این دیدار این دو مقام کابینه امارت اسلامی در مورد قیادت واحد نظام اسلامی به رهبری امیرالمؤمنین در افغانستان معلومات داده‌اند.
در خبرنامه آمده که آنان گفته‌اند در حال حاضر در افغانستان امنیت حاکم، شریعت نافذ بوده و نظام اسلامی با مردم از شفقت کار می‌گیرد.
در همین حال، شیخ رستم عبدالحی، رییس شورای علمای تاتارستان در مورد وضعیت جاری در کشورش معلومات داده است.
آقای عبدالحی گفته که در حال حاضر وضعیت مسلمانان نسبت به هرزمان دیگر در تاتارستان بهتر شده است.
او افزوده که علمای افغانستان را به چشم استاد می‌نگرد. گفتنی‌است که سرپرست وزیران معارف و تحصیلات عالی برای اشتراک در دومین نشست بین‌المللی وزیران معارف و تحصیلات عالی در روسیه، به این کشور سفر کرده‌اند.