مقام‌های ریاست عمومی شرکت‌های امارتی می‌گویند، در یک سال گذشته شش شرکت از کارافتاده امارتی دوباره فعالیت آغاز کرده است.
برخی از اعضای رهبری ریاست عمومی شرکت‌های امارتی امروز (یک‌شنبه، ۱ میزان) این مطلب را در برنامه تشریح دست‌آوردهای یک ساله ادارات امارتی بیان کردند.
بربنیاد معلومات آنان، کارخانه قند بغلان، افغان‌طیور، شرکت‌های نساجی کندهار، پلخمری و بلخ و شرکت امارتی بُست هلمند، از جمله شرکت‌های دوباره فعال شده‌اند.
در همین حال، مقام‌های ریاست عمومی شرکت‌های امارتی از افزایش در تولیدات کارخانه‌های تولید سمنت در بغلان و پروان خبر داده‌اند.
به گفته آنان، در یک سال گذشته ۱۹۹ هزار و ۶۷۱ تُن سمنت در کارخانه‌های تولید سمنت جبل‌السراج ولایت پروان و غوری ولایت بغلان، تولید شده است.
آنان تاکید کرده‌اند که اداره‌های پیشین توجه چندانی به شرکت‌های امارتی نه کرده‌اند.
گفتنی‌است که در ادامه تشریح دست‌آوردهای یک ساله ادارات امارتی، امروز نیز رهبری ریاست عمومی شرکت‌های امارتی دست‌آوردهای‌شان را تشریح کردند.