وزارت معارف می‌گوید، مولوی حبیب‌الله آغا، سرپرست این وزارت در راس هیات عالی‌رتبه به ولایت غور سفر کرده است.
این وزارت امروز (سه‌شنبه، ۱۷ میزان) با نشر خبرنامه‌ای از سفر مولوی حبیب‌الله آغا به ولایت غور خبر داده است.
به گفته وزارت معارف، هدف از سفر سرپرست این وزارت به ولایت غور بررسی وضعیت تعلیمی و تربیتی در این ولایت است.
بربنیاد خبرنامه، مولوی حبیب‌الله آغا پس از ورود به ولایت غور از مدرسه منبع‌العلوم در ولسوالی چهارسده این ولایت، دیدار کرده است.
در خبرنامه آمده که سرپرست وزارت معارف طی سخنانی در مراسم برگزار شده در مدرسه منبع‌العلوم بر عرضه خدمات متوازن تعلیمی در سراسر کشور به‌ویژه ساحات محروم، تاکید کرده است.
او آینده کشور را وابسته به داشتن نسل جوان و تعلیم بیان کرده است. سرپرست وزارت معارف پیش از این نیز به هدف بررسی وضعیت تعلیمی به ولایت‌های مختلف کشور سفر کرده است.