وزارت فواید عامه می‌گوید، هیات این وزارت به ریاست مولوی محمد اسحق صاحبزاده، معین خط‌آهن در ۸۱ مین نشست شورای ترانسپورت ریلی کشورهای مشترک‌المنافع اشتراک کرده است.
این وزارت امروز (شنبه، ۱۹ عقرب) با نشر خبرنامه‌ای از اشتراک این هیات در نشست یادشده، خبر داده است.
به گفته وزارت فواید عامه، ۸۱ مین نشت شورای ترانسپورت ریلی کشورهای مشترک‌المنافع در راستای همکاری‌های بین‌المللی، توسعه زیربناهای خط‌آهن و توسعه فناوری در امور خط‌آهن، برگزار شده است.
این وزارت افزوده که آقای صاحبزاده در حاشیه نشست یادشده با روئسای خطوط آهن، قزاقستان، تاجیکستان و اوزبیکستان دیدارهای دوجانبه داشته است.
بربنیاد خبرنامه، تطبیق پروژه‌های خط‌آهن و افزایش حجم انتقالات اموال تجارتی و ترانزیتی از طریق خط آهن، از محورهای این دیدارها بوده است. گفتنی‌است که افغانستان اخیرً عضویت ناظر در شورای ترانسپورت ریلی کشورهای مشترک‌المنافع را بدست آورده است.