مقام‌های محلی ولایت کاپیسا می‌گویند، مسابقات والیبال میان هفت تیم منتخب از ولسوالیهای این ولایت در شهر محمود راقی مرکز ولایت کاپیسا آغاز شد.
ریاست اطلاعات و فرهنگ ولایت کاپیسا امروز (سه‌شنبه، ۶ قوس) از آغاز این مسابقات خبر داده است.
در مراسم آغاز مسابقات والیبال قاری احسان‌الله بریال، والی کاپیسا و شماری از مسوولان محلی این ولایت نیز اشتراک کردند.
والی کاپیسا در این مراسم گفته است: این مسابقات به خاطر وحدت و اتحاد میان جوانان برگزار گردیده و ورزشکاران باید در جریان مسابقات اخلاق ورزشی را رعایت نموده واز جوانان ولسوالیهای خویش به خوبی نمایندگی نمایند.
بربنیاد خبرنامه، این مسابقات از سوی آمریت امور جوانان ریاست اطلاعات و فرهنگ ولایت کاپیسا در همکاری با آمریت ورزشی این ولایت، راه‌اندازی شده است.
قرار است در این مسابقات که به مدت سه روز به‌گونه حذفی برگزار شده، از هر ولسوالی ولایت کاپیسا به‌شمول مرکز، تیم‌ها باهم به مسابقه بپردازند. گفتنی‌است که در پایان مسابقات دو تیم برنده کپ و مدال دریافت خواهند کرد.