مقام‌های محلی ولایت پکتیکا می‌گویند، کار ۶۰ پروژه انکشافی به ارزش ۳۶۰ میلیون افغانی در ولایت پکتیکا آغاز شده است.
کار این پروژه‌ها در حضور داشت مولوی مخدوم عبدالسلام، معاون والی پکتیکا آغاز شده است.
به گفته معاون والی پکتیکا پروژه‌های یادشده بربنیاد حکم اختصاصی عالیقدر امیرالمؤمنین حفظه‌الله در پنج ولسوالی دور افتاده و نزدیک به خط فرضی دیورند تطبیق می‌شوند.
آقای عبدالسلام افزوده که پروژه‌های یادشده در ولسوالی‌‌های شکين، برمل، وړممی، نعمت‌اباد و تروه ولایت پکتیکا عملی می‌شود.
معاون والی پکتیکا همچنان گفته که پروژه‌های متذکره در بخش ساخت سرک‌ها، مکاتب، کلینیک‌ها، مدارس دینی، فراهم کردن آب آشامیدنی صحی و دیگر بخش‌ها تطبیق می‌شوند.
به گفته او سال آینده نیز قرار است پروژه‌های بیشتر اساسی و بنیادی در ولسوالی‌‌های یادشده عملی شود. گفتنی‌است که پس از حاکمیت امارت اسلامی تلاش‌ها به هدف فراهم کردن سهولت‌ها با باشندگان ولسوالی‌‌های دوردست کشور، تشدید شده است.