وزارت فواید عامه در آستانه فرا رسیدن فصل زمستان می‌گوید، آمادگی‌ها برای پاک‌کاری ۷ هزار و ۵۷۲ کیلومتر سرک از وجود برف اتخاذ شده است.
این وزارت امروز (سه‌شنبه، ۲۷ قوس) با نشر خبرنامه‌ای از این موضوع خبر داده است.
به گفته سخنگوی وزارت فواید عامه، قرار است هنگام برف‌باری‌های سنگین در فصل زمستان این مقدار سرک در ۲۸ ولایت کشور از سوی این وزارت و سکتور خصوصی پاک‌کاری گردد.
در پلان‌گذاری وزارت فواید عامه این مقدار سرک در ۳۰۲ نقطه در ۲۸ ولایت کشور، شناسایی شده است.
بربنیاد معلومات وزارت فواید عامه، از این میان ۴ هزار و ۵۴۲ کیلومتر سرک توسط کارمندان ولایتی این وزارت از وجود برف پاک‌کاری خواهد شد.
همچنان این وزارت از قرارداد پاک‌کاری ۲ هزار و ۷۲۰ کیلومتر سرک از وجود برف با سکتور خصوصی در ۱۴ ولایت کشور، خبر داده است.
این آمادگی‌ها شامل شاهراه‌های عمومی کشور از جمله سالنگ‌ها و ماهیپر نیز می‌شود.
این درحالی است که دو روز پیش نیز کارمندان ریاست ولایتی وزارت فواید عامه شاهراه کابل-غور را در ساحه “کوتل بکک” از وجود برف پاک‌کاری و این شاهراه را به‌روی ترافیک بازگشایی کردند.
وزارت فواید عامه: آمادگی پاک‌کاری هزاران کیلومتر سرک در فصل زمستان گرفته شده است
