وزارت فواید عامه می‌گوید، مولوی محمد اسحق صاحبزاده، معین خط‌آهن این وزارت در سفر به اوزبیکستان و دیدار با نرزلوف زفرغیاسویچ، رییس اداره خط‌آهن این کشور، بر همکاری گسترش خطوط آهن و انتقالات ریلی تاکید کرده است.
محمد اشرف حق‌شناس، سخنگوی وزارت فواید عامه امروز (جمعه، ۴ دلو) با نشر خبرنامه‌ای از سفر آقای صاحبزاده به اوزبیکستان خبر داده است.
به گفته آقای حق‌شناس، در دیدار هیات وزارت فواید عامه با مقامات اوزبیکستانی در مورد افزایش صادرات، واردات و انتقالات ریلی از طریق خط‌آهن حیرتان – مزارشریف و گسترش همکاری‌های دوجانبه در بخش خط‌آهن، بحث و گفت‌وگو کرده است.
در خبرنامه آمده که هیات وزارت فواید عامه با الهام محکموف، وزیر ترانسپورت کشور اوزبیکستان نیز دیدار کرده است.
در این دیدار دو طرف در مورد چگونگی آغاز عملی پروژه افغان- ترانس، هماهنگی و تسریع همکاری‌ها در این راستا، گفت‌وگو کرده‌اند.
وزارت فواید عامه هدف از سفر هیات این وزارت به اوزبیکستان را تداوم و گسترش روابط اقتصادی و تجارتی افغانستان با این کشور، بیان کرده است.
گفتنی‌است که تلاش‌ها برای گسترش شبکه‌های ریلی بخصوص در ولایت‌های شمالی و غربی کشور با کشورهای همسایه، ادامه دارد.