وزارت زراعت، آبیاری و مالداری از کمک بیش از ۲۶ تُن تخم غله‌جات و سبزی‌جات از سوی کشور اوزبیکستان به افغانستان خبر می‌دهد.
این وزارت امروز (دوشنبه، ۲۲ ثور) با نشر خبرنامه‌ای از این کمک کشور اوزبیکستان به افغانستان خبر داده است.
بربنیاد معلومات وزارت زراعت، آبیاری و مالداری این محموله کمکی شامل ۲۰ تُن شالی، ۵ تُن تخم پنبه و ۱.۳ تُن تخم سبزی‌جات را شامل می‌شود.
محموله متذکره به هیات وزارت زراعت، آبیاری و مالداری به رهبری مصباح‌الدین مستعین، رییس غله‌جات این وزارت در بندر حیرتان، تسلیم داده شده است.
در خبرنامه به نقل از آقای مستعین آمده که قرار است در آینده نزدیک کشور اوزبیکستان شماری از وسایل و ماشین‌آلات زراعتی را نیز به افغانستان کمک کند.
این کمک‌ها در حالی به افغانستان ارسال شده که چندی پیش عطاء‌الله عمری، سرپرست وزارت زراعت، آبیاری و مالداری در راس هیاتی به کشور اوزبیکستان سفر کرده بود.