داکتر عبدالباری عمر، رییس اجراییوی شرکت برشنا و دلیر جمعه، وزیر انرژی تاجیکستان متعهد شده‌اند که کابل و دوشنبه بگونه مشترک برای ثبات همه‌جانبه در بخش انرژی کار کنند.
د افغانستان برشنا شرکت امروز (پنج‌شنبه، ۲۵ ثور) با نشر خبرنامه‌ای این مطلب را بیان کرده است.
به گفته د افغانستان برشنا شرکت، هیات افغانستان به رهبری آقای عمر با وزیر انرژی کشور تاجیکستان دیدار کرده و روی پروژه کاسا ۱۰۰۰، انتقال انرژی و موضوعات اقتصادی بحث و گفت‌وگو کرده‌اند.
در خبرنامه به نقل از وزیر انرژی تاجیکستان آمده که گفته، کشورش با افغانستان به‌عنوان یک کشور همسایه اسلامی در بخش انتقال انرژی، ثبات و امنیت بگونه مشترک کار خواهد کرد.
همچنان رییس اجراییوی شرکت برشنا گفته که افغانستان و تاجیکستان مشترکات بسیاری دارند.
آقای عمر تاکید کرده که امارت اسلامی همواره تلاش می‌کند تا نسبت به جامعه جهانی با کشورهای اسلامی همسایه روابط خوب سیاسی و اقتصادی داشته باشد. روز گذشته هیاتی به رهبری داکتر عبدالباری عمر به هدف اشتراک در نشستی پیرامون پروژه کاسا ۱۰۰۰ به تاجیکستان سفر کرد.