وزارت صحت عامه می‌گوید، کشور هند یازده‌هزار دوز واکسین به افغانستان کمک کرده است.
این وزارت امروز (پنج‌شنبه، ۸ جوزا) از این کمک دوایی کشور هند به افغانستان خبر داده است.
به گفته وزارت صحت عامه، ۵ هزار و ۵۰۰ دوز واکسین «انفلونزا» و ۵ هزار و ۵۰۰ دوز دیگر واکسین «منینجیت» شامل این بسته کمک دوایی کشور هند به افغانستان است.
بربنیاد خبرنامه، مجموع این محموله کمک طبی کشور هند، ۲۹۱ کیلوگرام گفته شده است.
ظاهراً این بسته کمکی دهلی‌نو در میدان هوایی بین‌المللی کابل به مقامات وزارت صحت عامه کشور تسلیم داده شده است.
انفلونزا یا زکام، نوع بیماری شدید ویروسی و واگیر است که دستگاه تنفسی از جمله بینی، گلو و شش‌ها را هدف قرار می‌دهد. همچنان «منینجیت» یک نوع التهاب پرده‌های مغز و نخاع است که می‌تواند بسیار خطرناک حتی کشنده باشد.