شوکت میر ضیایف، رییس جمهور اوزبیکستان بار دیگر بر گفت‌وگوی سازنده جامعه جهانی با ا.ا. افغانستان تاکید کرده است.
آقای ضیایف این سخنان را طی بیانیه‌ای در مراسم افتتاحیه “فورم بین‌المللی سرمایه‌گذاری تاشکند” که نسخه‌ای از آن (سه‌شنبه‌شب، ۲۰ جوزا) در ویب‌سایت ریاست جمهوری اوزبیکستان نشر شده، بیان کرده است.
رییس جمهور اوزبیکستان افزوده، حمایت از افغانستان صلح‌آمیز و پایدار در حال حاضر یکی از موضوعات مهم در آجندای جهان است.
به گفته شوکت میرضیایف، گفت‌وگو‌های سازنده در سطح بین‌المللی با حکومت کنونی افغانستان از رفتن این کشور به انزوا جلوگیری می‌کند.
او افزوده است: ثبات و توسعه اقتصادی در افغانستان از عوامل کلیدی پیشرفت درازمدت برای تمام مناطق همجوار است.
بربنیاد معلومات دولت اوزبیکستان، نشست “فورم بین‌المللی سرمایه‌گذاری تاشکند” با حضور ۷ هزار و ۵۰۰ تن برگزار شده که حدود ۳ هزار تن از ۱۰۰ کشور جهان اشتراک کردهاند. در نشست یادشده هیاتی از افغانستان نیز به رهبری نورالدین عزیزی، سرپرست وزارت صنعت و تجارت کشور اشتراک کرده است.