ملا عبدالغنی برادر آخوند، معاون اقتصادی رییس‌الوزرا در راس هیات بلندپایه امارتی به دعوت رسمی دولت آذربایجان، رهسپار این کشور شد.
معاون اقتصادی ریاست‌الوزرا امروز (سه‌شنبه، ۱۰ سرطان) با نشر خبرنامه‌ای از سفر آقای برادر آخوند، خبر داده است.
به گفته معاونیت اقتصادی رییس‌الوزرا، هدف از سفر ملا عبدالغنی برادر آخوند به آذربایجان اشتراک در «هفدهمین نشست سران سازمان همکاری اقتصادی (ایکو)» است.
بربنیاد خبرنامه، معاون اقتصادی رییس‌الوزرا و هیات همراهش پیش از چاشت امروز کابل را به مقصد باکو، ترک کرده‌اند.
قرار است آقای برادر آخوند علاوه از اشتراک و سخنرانی در نشست یادشده، با شماری از مقام‌های دولت آذربایجان نیز روی گسترش روابط دوجانبه در بخش‌های مختلف دیدار و گفت‌وگو کند.
شماری از مقام‌های امارتی از جمله داکتر محمد نعیم وردک، معین اداری وزارت امور خارجه، معاون اقتصادی رییس‌الوزرا را در این سفر همراهی می‌کند. هفدهمین نشست سران سازمان همکاری اقتصادی (ایکو) به تاریخ ۳ و ۴ ماه‌جاری میلادی (جولای) در آذربایجان برگزار می‌شود.