مقام‌های سازمان ملل متحد در افغانستان (UNHCR) نسبت به احتمال اخراج مهاجرین افغان از تاجیکستان ابراز نگرانی کرده‌اند.
عرفان جمال، رییس کمیشنری عالی سازمان ملل متحد در امور پناهندگان در افغانستان (UNHCR) در کابل در یک گفت‌وگوی ویژه با رادیو امید این نگرانی را مطرح کرده است.
به گفته آقای جمال، تا آنجا که برای آنان اطلاع رسیده، دولت تاجیکستان ضرب‌الاجل زمانی برای اخراج‌اجباری مهاجرین افغان از این کشور تعیین کرده است اما تاهنوز اقدام اجرایی اتخاذ نکرده است.
او تاکید می‌کند که در ماه‌های اخیر یک اعشاریه شش میلیون مهاجر افغان از ایران و پاکستان به افغانستان اخراج شده‌اند.
آقای جمال می‌گوید، اخیراً اخراج‌اجباری مهاجرین افغان از ایران شدت بیشتر به خود گرفته است.
این مقام سازمان ملل همچنان می‌افزاید که سازمان ملل متحد در همکاری نزدیک با ا.ا. افغانستان کمک‌های لازم به شهروندان برگشته افغان را در گذرگاه‌ها و امتداد خطوط فرضی دیورند ارایه می‌دهد.
این در حالی است که اخیراً گزارش‌های مبنی‌بر اخراج احتمالی مهاجرین افغان از تاجیکستان در رسانه‌ها نشر شده است.