کمک ۲۴ میلیون افغانی باشندگان خوست به معارف

مسوولان محلی معارف ولایت خوست می‌گویند، باشندگان این ولایت در چارچوب شوراهای محلی ۲۴ میلیون افغانی را به معارف کمک کرده‌اند.
دفتر مطبوعاتی ریاست معارف ولایت خوست امروز (پنج‌شنبه، ۲۶ سرطان) با نشر خبرنامه‌ای از این کمک مردمی خبر داده است.
عبدالهادی سیار، مدیر شوراها در ریاست معارف ولایت خوست حین ارایه گزارش ربعوار فعالیت هایش به رییس معارف این ولایت گفته که باشندگان بخش‌های مختلف ولایت خوست از هزینه شخص‌شان برای بهبود معارف کمک کرده‌اند.
بربنیاد خبرنامه، رهبری معارف ولایت خوست از کمک‌های مردمی به معارف این ولایت استقبال کرده‌اند.
در خبرنامه به نقل از فیض‌الله جمال، رییس معارف ولایت خوست آمده که کمک شوراهای محلی را ستایش و بر پایداری فعالیت شوراها تاکید کرده است.
به گفته آقای جمال، این کمک‌ها بیانگر علاقمندی عمیق باشندگان ولایت خوست به معارف، علم و دانش است.
گفتنی است که پیش از این نیز باشندگان ولایت‌های مختلف کشور به هدف تقویت علم و دانش، کمک‌های مردمی را به معارف کشور انجام داده‌اند.