مسوولان ریاست معارف ولایت هرات می‌گویند، در جریان سه ماه نخست سال‌جاری (۱۴۰۴) هجری خورشیدی باشندگان این ولایت ۲۰ میلیون و ۵۰۰ هزار افغانی را به معارف کمک کرده‌اند.
مولوی رحمت‌الله جابر، رییس معارف ولایت هرات از این کمک‌های مردمی به این نهاد خبر داده است.
به گفته آقای جابر، کمک‌های مردمی به معارف ولایت هرات از طریق اعضای شوراهای مکاتب، افراد خیّر و تجار ملی، در این ولایت صورت گرفته است.
رییس معارف ولایت هرات تاکید می‌کند که کمک‌های انجام‌شده شامل خریداری اجناس، اهدای زمین، اعمار صنف‌های آموزشی و ترمیم مکاتب بوده است.
مسوولان ریاست معارف ولایت هرات از کمک‌های انجام‌شده مردمی باشندگان این ولایت استقبال کرده‌اند.
آنان تاکید کرده‌اند که این کمک‌ها نقش ارزنده‌ای در بهبود کیفی فعالیت‌های معارف در ولایت هرات خواهد داشت.
پیش از این مسوولان ریاست معارف ولایت خوست نیز از کمک‌های مردمی به ارزش میلیون‌ها افغانی به این نهاد از طریق شوراها خبر داده بودند.