وزارت صحت عامه می‌گوید، به هدف رسیدگی به مشکلات صحی مهاجرین برگشته افغان از تاجیکستان، یک کمپ سیار صحی در ولایت کندز ایجاد شده است.
این وزارت امروز (چهارشنبه، ۸ اسد) با نشر خبرنامه‌ای از ایجاد این کمپ خبر داده است.
به گفته وزارت صحت، کمپ یادشده از سوی ریاست صحت‌عامه ولایت کندز در هماهنگی با ریاست امور مهاجرین این ولایت در «شیرخان بندر» ایجاد شده است.
در خبرنامه به نقل از داکتر محمدالله حکمت، رییس صحت عامه ولایت کندز آمده است: دو تیم سیار صحی از دفتر آقاخان، یک تیم سیار از دفتر BDN و یک تیم سیار صحی از دفتر JAC موظف شده اند تا طبق برنامه کاری و جدول زمانی، خدمات صحی ۲۴ ساعته را به مهاجرین در شیرخان بندر ارائه نمایند.
علاوه بر این، مراکز صحی ولایت کندز نیز دستور دریافت کرده‌اند تا رسیدگی به مشکلات مهاجرین برگشته از تاجیکستان را در اولویت خود قرار دهند.
این در حالی است که اخیراً گزارش‌های مبنی‌بر اخراج مهاجرین افغان از کشور تاجیکستان نیز به نشر رسیده است. بربنیاد گزارش‌ها، دولت تاجیکستان تایید کرده که مهاجرین فاقد اسناد قانونی اقامت در این کشور را اخراج کرده است.