دیدار هیات بلندپایه جمهوری تاجیکستان با وزیر امور خارجه 

وزارت امور خارجه می‌گوید، هیات بلندپایه حکومت تاجیکستان در سفر به کابل با مولوی امیرخان متقی، وزیر امور خارجه دیدار کرده است.
این وزارت امروز (دوشنبه، ۲۶ عقرب) با نشر خبرنامه‌ای از دیدار این هیات خبر داده است.
به گفته وزارت امور خارجه در این دیدار روی تقویت و گسترش مناسبات در زمینه‌های مختلف بخصوص روابط دیپلماتیک و همکاری‌های اقتصادی بحث و تبادل نظر کرده‌اند.
آقای متقی با اشاره به روابط دیرینه و تاریخی میان تاجیکستان و افغانستان افزوده که ا.ا. بدنبال گسترش روابط حسنه و همسایه‌داری نیک با جمهوری تاجیکستان است.
او ابراز امیدواری کرده که در آینده نزدیک گواه پیشرفت در روابط دو کشور باهم برادر باشیم.
در همین حال، هیات جمهوری تاجیکستان از پیشرفت در روابط کابل و دوشنبه اطمینان داده است.
این هیات تاکید کرده افغانستان و تاجیکستان می‌توانند در عرصه‌های مختلف همکاری نزدیک باهم داشته باشند.
در پایان این دیدار بر تداوم روابط و نشست‌های دوجانبه تاکید شده است.
گفتنی است که پس از حاکمیت دوباره ا.ا. این نخستین سفر یک هیات بلندپایه جمهوری تاجیکستان به افغانستان است.