پس از حدود ۱۰ سال توقف، ریاست عمومی تصدی ملی‌بس اعلام کرده که فعالیت بس‌های دولتی در شاهراه کابل-لوگر از سر گرفته شده است.
به گزارش خبرنگار محلی رادیو امید، فعالیت بس‌های یادشده امروز (چهارشنبه، ۱۰ ثور) طی مراسمی در شهر پل‌عَلَم، مرکز ولایت لوگر، افتتاح شده است.
الهام‌الدین، آمر حوزه اول ریاست تصدی ملی‌بس در این مراسم گفته که پس از این روزانه چهار عراده بس دولتی در شاهراه کابل-لوگر فعالیت خواهد کرد.
به گفته آقای الهام‌الدین ریاست تصدی ملی‌بس تلاش خواهد کرد تا فعالیت بس‌های دولتی در ولسوالی‌های ولایت لوگر نیز گسترش یابد.
در همین حال، مولوی محمد انور دین‌پرور معاون والی لوگر از این اقدام ریاست عمومی تصدی ملی‌بس استقبال کرده است
آقای دین‌پرور از باشندگان ولایت لوگر خواسته که از بس‌های دولتی مطابق اصول ریاست عمومی تصدی ملی‌بس استفاده کنند.
بربنیاد معلومات مقام‌های ریاست عمومی تصدی ملی‌بس، کرایه کابل-لوگر و برعکس آن در بس‌های دولتی ۵۰ افغانی بوده و از نوجوانان زیر سن ۱۴ سال نیز کرایه اخذ نمی‌شود.