سردار بردی محمدوف، رییس جمهور ترکمنستان می‌گوید، کشورش ادامه گفتوگوهای عملی با مقامات ا.ا. در افغانستان را مهم می‌داند.
وزارت امور خارجه ترکمنستان این مطلب را امروز (شنبه، ۱۰ جوزا) در بیانیه به نقل از رییس جمهور این کشور بیان کرده است.
بربنیاد بیانیه، رییس جمهور ترکمنستان که در نخستین نشست کشورهای آسیای میانه – ایتالیا در شهر آستانه پایتخت قزاقستان سخن می‌گفت، تاکید کرده که وضعیت افغانستان را نمی‌توان نادیده گرفت.
او گفته است: ترکمنستان تلاش‌هایش را برای اجرای پروژه‌های بزرگ منطقه‌ای چون لوله گاز تاپی (TAPI)، خط برق ترکمنستان-افغانستان-پاکستان، و ساخت خطوط آهن به سوی افغانستان ادامه خواهد داد.
سردار بردی محمدوف، رییس جمهور ترکمنستان همچنان خواستار تقویت کمک‌های بشردوستانه در افغانستان شده است. نخستین نشست پنج کشورهای آسیای میانه و ایتالیا با حضور روئسای جمهور قزاقستان، ترکمنستان، تاجیکستان، اوزبیکستان و قرغیزستان و نخست‌وزیر ایتالیا روز گذشته برگزار شد.