وزارت امور مهاجرین و عودت‌کنندگان تایید کرده که ۲۶ تن از شهروندان افغان به تازگی از زندان‌های کشور پاکستان آزاد شده‌اند.
این وزارت امروز (دوشنبه، ۲ سرطان) با نشر خبرنامه‌ای از آزادی شهروندان افغان خبر داده است.
به گفته وزارت امور مهاجرین و عودت‌کنندگان، این تعداد شهروندان کشور با وجود داشتن مدارک قانونی اقامت، از سوی پولیس پاکستان بازداشت شده بودند.
بربنیاد خبرنامه، شهروندان تازه آزادشده افغان پس از آزادی از زندان، روز گذشته از طریق گذرگاه اسپین‌بولدک ولایت کندهار وارد کشور شده‌اند.
هریک از این شهروندان کشور از یک تا هفت روز را در زندان‌های کشور پاکستان سپری کرده‌اند.
شهروندان آزادشده افغان پس از دریافت کمک‌های لازم بشری به محلات اصلی‌شان انتقال شده‌اند.
این در حالی است که هفته گذشته نیز ده‌ها شهروند افغان از زندان‌های پاکستان آزاد و وارد کشور شدند.