کمپاین ملی واکسین بیماری «سرخکان» آغاز شد؛ قرار است ۱۸ میلیون طفل واکسین شوند

وزارت صحت عامه طی مراسمی کمپاین ملی واکسین بیماری «سرخکان» را برای میلیون‌ها کودک در کشور آغاز کرد.
به گزارش خبرنگار رادیو امید، این کمپاین امروز (دوشنبه، ۷ میزان) با حضور مقامات صحی کشور در کابل گشایش یافت.
مولوی عبدالولی حقانی، معین عرضه خدمات صحی وزارت صحت عامه در این مراسم گفته که قرار است در سال‌جاری در دو کمپاین، ۱۸ میلیون کودک ۶ ماهه تا ۱۰ ساله در برابر بیماری «سرخکان» واکسین شده و معافیت حاصل کنند.
آقای حقانی با استناد به آمارهای جهانی می‌گوید، همه ساله در نتیجه تطبیق کمپاین‌های واکسین زندگی ۴ تا ۵ میلیون کودک نجات داده می‌شود.
او از شهروندان کشور خواسته که در جریان کمپاین واکسین با تیم‌های تطبیق‌کننده همکاری لازم را انجام دهند.
در همین حال، داکتر حیدرخان حیدری، رییس طب وقایوی وزارت صحت عامه می‌گوید، با تطبیق کمپاین واکسین تا ۷۰ درصد آمار مبتلایان به بیماری «سرخکان» کاهش یافته است.
بیماری «سرخکان (Measles)» یک بیماری حاد و به شدت ساری بوده و از ویروس ناشی می‌شود.
هرچند این بیماری کودکان را آماج قرار می‌دهد اما می‌تواند بزرگ‌سالانی که واکسین نشده باشند را نیز مبتلا کند.