شوکت میرضیایف، رییس جمهور اوزبیکستان می‌گوید، وضعیت افغانستان به‌گونه مستقیم روی امنیت و توسعه پایدار منطقه تاثیر دارد از این جهت باید به آن توجه ویژه شود.
آقای ضیایف این موضوع را در بیانیه افتتاحیه‌اش در هفتمین نشست سران آسیای مرکزی که متن آن امروز (یک‌شنبه، ۲۵ عقرب) در ویب‌سایت ریاست جمهوری اوزبیکستان به نشر رسیده، بیان کرده است.
رییس جمهور اوزبیکستان تاکید کرده که حضور افغانستان در پروژه‌های «زیربنایی، انرژی و ترانسپورتی» بخش جدایی‌ناپذیر سیاست منطقه باید باشد.
او گفته است: ما باور راسخ داریم که ادغام افغانستان در پروژه‌های زیربنایی، انرژی و ترانسپورتی ما باید بخش جدایی‌ناپذیر سیاست کلی منطقه‌ای ما باشد.
شوکت میرضیایف همچنان تصریح کرده که برای تقویت اتصال میان منطقه‌ای، کشورهای آسیای مرکزی پروژه‌های خط‌آهن چین-قرغیزستان-اوزبیکستان و افغان-ترانس را در اولویت خویش قرار دهند.
هفتمین نشست سران کشورهای آسیای مرکزی به میزبانی اوزبیکستان در شهر تاشکند در حال برگزاری است. در این نشست سران کشورهای اوزبیکستان، قرغیزستان، قزاقستان، ترکمنستان و تاجیکستان در موجودیت آذربایجان به‌عنوان مهمان ویژه، پروژه‌های اقتصادی راهبردی آسیای مرکزی را به بحث و بررسی می‌گیرند.