وزارت صنعت و تجارت میگوید، هیات مشترک دولتی و سکتور خصوصی اوزبیکستان همراه با معین مالی واداری این وزارت به ولایت بلخ، سفر کردند.
دفتر رسانههای این وزارت امروز (یکشنبه، ۲۰ ثور) با نشر خبرنامهای گفته این هیات به رهبری امانبای اورین بایوف، رییس مجلس عالی قارهقلپاقستان اوزبیکستان در حالی که توسط مولوی شهابالدین ثاقب، معین مالی و اداری وزارت صنعت و تجارت همراهی میشد، عازم ولایت بلخ شده است.
هدف از این سفر، برگزاری کنفرانس تواصل تجارتی، اشتراک در نشستهای تجاری سکتورخصوصی افغانستان و اوزبیکستان و گشایش نمایشگاه تولیدات داخلی اوزبیکستان در شهر مزارشریف، گفته شده است.
هیات بلندرتبه مشترک دولتی و سکتورخصوصی جمهوری قارهقلپاقستان اوزبیکستان روز گذشته وارد کابل شد. این هیات پس از دیدار با مولوی نورالدین عزیزی، وزیر صنعت و تجارت، ۱۳ تفاهمنامه همکاری در بخش صادرات و واردات با جانب افغانستان،امضاء کرد.