وزارت اطلاعات و فرهنگ افغانستان اعلام کرده است که هیأت فرهنگی جمهوری اوزبیکستان، به‌منظور تقویت روابط فرهنگی میان دو کشور، با مسئولان محلی و فرهنگیان ولایت فاریاب دیدار و گفت‌وگو کرده است.
این هیأت به سرپرستی عزیزجان عارپ‌جانوف معاون رئیس آژانس میراث‌های فرهنگی اوزبیکستان، و با همراهی جعفر فتاحوف، سرقونسل این کشور در بلخ، از شماری از آثار تاریخی ولسوالی اندخوی، از جمله آبدهٔ باباولی، مسجد جامع، مدرسه، حوض تاریخی شیبانی‌ها و زیارت چهارده معصوم بازدید کرد.
در جریان این دیدار، مسئولان اطلاعات و فرهنگ فاریاب دربارهٔ پیشینه و ارزش تاریخی این آثار معلومات ارائه کرده و پیشنهادهای خود را در زمینهٔ ترمیم و حفاظت از آن‌ها مطرح کردند.
اعضای هیأت اوزبیکستانی نیز بر اهمیت حفاظت از میراث‌های تاریخی و فرهنگی تأکید کرده و از تلاش‌های مسئولان فاریاب در این زمینه قدردانی کردند.
هیأت فرهنگی اوزبیکستان از آثار تاریخی اندخوی بازدید کرد
