مریم بنت علی بن ناصر المسند وزیر دولت قطر در امور همکاری‌های بین‌المللی، بر ادامه تعامل جامعه جهانی با افغانستان و گسترش همکاری‌های عملی با این کشور تأکید کرده است.
او در نشست گروه هماهنگی افغانستان گفته است که آینده افغانستان باید از راه یک روند سیاسی فراگیر و به رهبری افغان‌ها، با احترام به حاکمیت ملی و استقلال این کشور، تعیین شود.
المسند افزوده است که قطر در ده سال گذشته، نزدیک به ۱۵۰ میلیون دالر برای کمک‌های بشردوستانه و حمایت از پروژه‌های انکشافی در افغانستان کمک کرده یا وعدهٔ کمک داده است.
او همچنان خواستار هماهنگی بیشتر میان نهادهای بین‌المللی شده تا کمک‌های بشردوستانه به‌موقع به مردم نیازمند افغانستان برسد.