الکساندر میتیو، رییس بخش آسیا پسفیک فدراسیون بین‌المللی صلیب سرخ می‌گوید، دور جدید اخراج‌اجباری مهاجرین افغان از پاکستان، تاثیر منفی بر وضعیت بشری در افغانستان دارد.
ارگ با نشر خبرنامه‌ای گفته که آقای میتیو این سخنان را در دیدار با مولوی عبدالکبیر، معاون سیاسی ریاست الوزرا، بیان کرده است.
رییس آسیا پسفیک فدراسیون بین‌المللی صليب سرخ گفته که نگرانی‌های‌شان را بخاطر دور جدید اخراج‌اجباری مهاجرین افغان، با مقام‌های پاکستانی شریک کرده‌اند.
الکساندر میتیو همچنان گفته که تلاش می‌کنند تا سطح کمک‌های صلیب سرخ به افغانستان را در سال‌جاری افزایش دهند.
او حمایت امارت اسلامی از جمعيت هلال‌احمر افغانی را در جذب کمک‌های بیشتر بین‌المللی به این نهاد موثر خوانده است.
در همین حال، مولوی عبدالکبیر، معاون سیاسی رییس‌الوزرا از کمک‌های صلیب سرخ به افغانستان تشکر کرده گفت که امارت اسلامی از کمک‌های مفید و خیریه این نهاد به کشور، حمایت می‌کند.
معاون سیاسی رییس‌رییس‌الوزرا خواستار از سرگیری کمک‌های صلیب سرخ به برخی از شفاخانه‌های کشور شد. صلیب سرخ از نهادهای معتبر جهانی است که عمدتاً در بخش کمک‌های صحی و بشردوستانه فعالیت دارد.