وزارت تحصیلات عالی می‌گوید، شیخ ندا محمد ندیم، سرپرست این وزارت به کشور روسیه سفر کرده است.
حافظ ضیاالله هاشمی، سخنگوی این وزارت امروز (شنبه، ۱۹ جوزا) در یک نوار تصویری از سفر سرپرست وزارت تحصیلات عالی به روسیه خبر داده است.
به گفته آقای هاشمی، شیخ ندا محمد ندیم، سرپرست وزارت تحصیلات عالی به هدف اشتراک در کنفرانس چهار روزه وزیران معارف و تحصیلات عالی کشورهای مختلف که از سوی روسیه برگزار شده به شهر کازان این کشور سفر کرده است.
آقای هاشمی افزوده که دیدار با وزیران تحصیلات عالی شماری از کشورها و پوهنتون‌های روسیه در حاشیه این سفر برنامه‌ریزی شده است. پیش از این وزارت معارف نیز از سفر شیخ حبیب‌الله آغا، سرپرست این وزارت به کشور روسیه و اشتراک در کنفرانس یادشده خبر داده است.