وزارت تحصیلات عالی به نقل از یادگار خواجه شادمانوف، سفیر اوزبیکستان مقیم کابل می‌گوید، این کشور ۵۰ بورسیه تحصیلی برای جوانان افغانستان اهدا می‌کند.
این وزارت با نشر خبرنامه‌ای از اهدای این تعداد بورسیه تحصیلی کشور اوزبیکستان به جوانان افغانستان خبر داده است.
آقای شادمانوف در دیدار با دوکتور لطف‌الله خیرخواه، معین علمی وزارت تحصیلات عالی از اهدای بورسیه‌های تحصیلی اوزبیکستان به افغانستان سخن گفته است.
سفیر اوزبیکستان آمادگی کشورش را برای گسترش همکاری‌های علمی با افغانستان، بیان کرده است.
در همین حال، معین علمی وزارت تحصیلات عالی کشور در پیوند به حل مشکلات محصلان افغان در اوزبیکستان، اهدای بورسیه‌های تحصیلی و همکاری‌های علمی دوجانبه، صحبت کرده است.
آقای خیرخواه با قدردانی از کمک‌های اوزبیکستان در عرصه‌های تحصیلی با افغانستان و اشاره به مشترکات دینی، فرهنگی و زبانی به همکاری‌های دوجانبه تحصیلی تاکید کرده است.
گفتنی‌است که در حال حاضر نیز ۴۳ تن از محصلان افغان در کشور اوزبیکستان سرگرم فراگیری تحصیلات عالی هستند.