معاونیت اقتصادی رییس‌الوزرا می‌گوید، ملا عبدالغنی برادر آخوند، در راس یک هیات عالی‌رتبه امارتی به اوزبیکستان سفر کرده است.
معاونیت اقتصادی امروز (پنج‌شنبه، ۷ سنبله) از سفر آقای برادر خبر داده است.
بربنیاد خبرنامه، هدف از سفر معاون اقتصادی رییس‌الوزرا به شهر مرزی ترمذ اشتراک در مراسم افتتاح مرکز تجارتی بین‌المللی ترمذ گفته شده است.
این هیات به دعوت رسمی مقام‌های اوزبیکستان صورت گرفته است.
قرار است در این مراسم علاوه از معاون اقتصادی رییس‌الوزرا، نخست‌وزیر اوزبیکستان، معاون اول نخست‌وزیر آذربایجان، همچنان نمایندگان با صلاحیت کشورهای قزاقستان و قرغیزستان اشتراک خواهند کرد.
این در حالی است که پس از حاکمیت امارت اسلامی، روابط سیاسی و اقتصادی افغانستان با کشورهای آسیای میانه افزایش یافته است.