نورالدین عزیزی، سرپرست وزارت صنعت و تجارت می‌گوید، به مشکلات تاجران افغان و اوزبیک در بازار مشترک افغانستان و اوزبیکستان رسیدگی میشود.
وزارت صنعت و تجارت با نشر خبرنامه‌ای جمعه‌شب (۲ قوس) این مطلب را به نقل از آقای عزیزی، بیان کرده است.
به گفته وزارت صنعت و تجارت، سرپرست این وزارت در سفر به مرکز بین‌المللی افغانستان – اوزبیکستان از بازار مشترک میان دو کشور دیدن کرده است.
آقای عزیزی با مسوولان افغان و اوزبیکستانی این بازار در مرکز یادشده دیدن کرده و روی موضوع مهم و کلیدی که به توجه فوری نیاز دارد، بحث و تبادل نظر کرده است.
در خبرنامه آمده که سرپرست وزارت صنعت به تقویت همکاری‌ها در بازار مشترک تاکید کرده است.
این مقام امارت اسلامی به مسوولان و تاجران بازار مشترک افغانستان اطمینان داده که رسیدگی به مشکلات آنان در اولویت قرار داده میشود. گفتنی‌است که بازار مشترک میان افغانستان و اوزبیکستان چندی پیش با سرمایه‌گذاری ده‌ها میلیون دالر افتتاح و به روی اتباع دو کشور بازگشایی شد.