د کورنیو چارو سرپرست وزير خلیفه سراج الدین حقاني د افغانستان لپاره د اروپايي ټولنې له سفیرې رافایلا یودیچه سره په کتنه کې ویلي چې د مسایلو د ښه پوهېدو په موخه دې په نړیوالو بنسټونو کې د اسلامي امارت استازو ته ځای ورکړل شي. خلیفه حقاني وړاندې ویلي چې افغانستان د تېرو څو لسیزو تر ناخوالو او جګړو وروسته په بېړه د ځان بسیاینې او تلپاتې سیاسي او اقتصادی ټیکاو پر لور روان دی.
خلیفه صاحب ویلي چې اوسمهال تر بل هر وخته افغانان د غوره فزیکي او رواني امنیت څخه برخمن دي او د خوښۍ احساس کوي.
ښاغلي حقاني ټینګار کړی چې په نړیوالو سازمانو کې دې د اسلامي امارت استازي ومنل شي؛ څو د افغان ولس ریښتینې استازولي وکړي.
په دې کتنه کې د افغانستان لپاره د اروپايي ټولنې سفیرې، د امنیت د تامین په برخه کې د اسلامي امارت هڅې وستایلې او ددې ټولنې په مشرۍ یې ډاډ څرګنداوه چې له افغانانو سره به له بشري مرستو مخ نه اړوي.آغلې یودیچه ژمنه کړې چې د هرات له زلزله ځپلو او له پاکستانه راستنېدونکو افغانانو سره به بشري مرستې کوي.
د چارو یو شمېر شنونکي هم تاکید کوي چې په نړیوالو بنسټونو کې دې د اوسني حکومت استازي وګومارل شي، څو ستونزې له نږدې او په سمه توګه حل شي.
یاده دې شي چې په ملګرو ملتونو کې د افغانستان پر څوکۍ لا هم د تېر جمهوریت استازی نصیر فایق دنده ترسره کوي چې اسلامي امارت څو ځله له نړیوالې ټولنې د خپل استازي د منلو غوښتنه کړې ده.