ملي دفاع وزارت نن یکشنبه ( د سلواغې په ۲۲مه) په خپله اېکس پاڼه لیکلي چې د دغه وزارت یوه پلاوي د ازبکستان هیواد د سرحدونو له عمومي قومندان سره کتلي دي.
ملي دفاع وزارت زیاتوي چې افغان پلاوي د ۲۰۹ الفتح قول اردو د قوماندان ملا رحمت الله محمد په مشرۍ د ازبڪستان هیواد د سرحدونو له عمومي قوماندان حسن اوف سلیم جان او مله پلاوي سره د ازبڪستان په صفري نقطه کې کتلي.
د ملي دفاع وزارت له لوري تللي پلاوي له ازبکستاني لوري سره د سرحد اړوندو ستونزو په تړاو خبرې کړي دي.
ورته مهال دواړو لوریو د دوه اړخیزو اړیکو پر پیاوړتیا، د همغږۍ پر زیاتوالي او ګډې همکارۍ ټینګار کړی.