د هلمند ځایي مسوولین وایي چې په دغه ولایت کې د څه باندې ۱۴ میلیونو افغانیو په ارزښت دوې رغنیزي پروژې پیل شوې.
ویل کیږي چې په دغو دوو پروژو کې د هلمند مرکز لښکرګاه اړوند اتمه ناحیه کې مرکز لښکرګاه ته دخولي دروازه او د کندهار ـ هلمند عمومي سړک په پاخه او اساسي ډول رغول شامل دي.
ټاکل شوې چې ددې پروژومالي لګښت د لښکرګاه ښاروالۍ له انکشافي بودیجې څخه ورکول شي.
د لښکرګاه ښاروالۍ د مطبوعاتو مسوول محمدطاهرابشار امید راډیو ته وویل: دغه دوې پروژې د لښکرګاه ښاروالۍ له انکشافي بودیجې ورکول کیږي چي یوه یې لښکرګاه ښار ته د دخولي دروازې جوړول دي چي لګښت يې (۵۹۵۳۷۲۰) پنځه میلیونه نهه لکه درې پنځوس زره اووه سوه او شل افغانۍ کیږي او دویمه هغه يې د هلمند ـ کندهارد سړک د جوړولو ده چي لګښت يې ۸۹۵۴۰۸۰ اته میلیونه نهه لکه څلور پنځوس زره او اتیا افغانیو ته رسیږي.
د لښکرګاه ښاروالۍ مرستیال ملا نیک محمد اُمتي وویل: د ښاروالۍ مسوولین له پخوا څخه په دې هڅه کي وو ترڅو مرکز لښکرګاه ته دخولي دروازه په بنسټیزه بڼه ورغوي.
نوموړي زیاته کړه: د ښاروالۍ مسوولین به لا هم هڅه وکړي چي په ښار کي د بیارغونې نورې پروژې پیل کړي.
د لښکرګاه ښاروالۍ له لوري دا پروژې په داسې حال کې پیلیږي چي د اسلامي امارت په راتلو سره په هلمند کې ډیری رغنیزي پروژې پیل، بشپړې شوي او د هملندي وګړو ستونزې ورسره هوارې شوي دي.