د هېواد د وسپنې پټلۍ ادارې اعلان کړی چې د ۶ میلیونه او ۳۰۰ زره امریکايي ډالرو په لګښت د مزارشریف – ازبکستان د اورګاډي د پټلۍ د بیارغونې چارې یې پیل کړي دي.
دې رياست په يوه خبرپاڼه کې ويلي چې د يادې پروژې د بيارغونې چارې پرون (چهارشنبه، کب دويمه) د يو شمېر مسوولينو له خوا پرانيستل شوې.
خبر زیاتوي چې ددغې پروژې د بیارغونې چارې د یوې ازبکستانۍ کمپنۍ له خوا پر مخ وړل کیږي.
ټاکل شوې چې د دغې پروژې کار په راتلونکو درېیو میاشتو کې بشپړ او ګټې اخیستنې ته وسپارل شي.
د مزارشريف – ازبکستان ریل پټلۍ ۷۵ کيلومتره اوږدوالی لري او د بلخ ولايت له هوايي ډګر څخه تر ازبکستان هېواده غځول کېږي.
د ریاست الوزرا اقتصادي معاونیت هم پرون(چهارشنبه، کب دویمه) د خواف-هرات د څلورمې قطعې د دویمې برخې پروژې طرحه او منظور کړه.
د ویلو ده چې په دې وروستیو کې د وسپنې پټلۍ ادارې خپل کارونه ګړندې کړي او ګڼې پروژې یې ترلاس لاندې دي.