د اسلامي امارت ویاند مولوي ذبیح الله مجاهد وايي چې د څلورو هېوادونو(قرقیزستان، ازبکستان، افغانستان او پاکستان ) د چارواکو ترمنځ د کاسا ۱۰۰۰ پروژې تړون لاسلیک شو.
ښاغلي مجاهد نن (شنبه، کب ۱۹مه) په خپله ایکسپاڼه د دغه تړون د لاسلیک اعلان وکړ.
د اسلامي امارت د ویاند د معلوماتو پر بنسټ، د دې سترې پروژې تړون د افغانستان، قرقیزستان، ازبکستان او پاکستان چارواکو لاسلیک کړی دی.
مولوي ذبیح الله مجاهد زیاته کړه چې د انرژۍ د دغې مهمې پروژې عملي کار به د راتلونکې میاشتې په پای کې پیل شي.
دا تړون په داسې حال کې لاسلیک شو چې نړیوال بانک په دې وروستیو کې د دغې سیمه ییزې پروژې د ملاتړ د بیا پیل اعلان وکړ.
کاسا ۱۰۰۰ پروژه په سیمه کې یوه له سترو پروژو څخه ده چې د منځنۍ اسیا له هېوادونو څخه جنوبي اسیا ته برېښنا لېږدوي.