د صنعت او سوداګرۍ وزیر نورالدین عزیزي ازبکستان ته د خپل سفر په ترڅ کې د یاد هېواد له لومړي وزیر مرستیال جمشید خواجه یف او نورو لوړپوړو چارواکو سره کتلي دي.
د صنعت او سوداګرۍ وزارت په یوه خبر کې ویلي چې دې کتنه کې د دوه اړخیزو سوداګریزو او ټرانزېټي اړیکو پر پراختیا او د دواړو هېوادونو ترمنځ د سوداګرۍ پر انډول خبرې شوي دي.
همدارنګه په دې کتنه کې د ریل پټلۍ د سکټور پر ودې او د سورخان – پلخمري د برېښنا لېږد په برخه کې د همکاریو په اړه بحثونه شوي. د صنعت او سوداګرۍ وزارت له قوله، دواړو هېوادونو د سوداګریزې ګډې خونې پر جوړولو او همدارنګه د سوداګریزو راکړو ورکړو پر زیاتوالي بحثونه کړي دي.
د یادونې وړ ده چې د صنعت او سوداګرۍ وزیر د یوه پلاوي په مشرۍ ازبکستان کې د افغاني توکو د یوه نندارتون پرانیستې ته تللی دی.