د امریکا د ولسمشر ډونالد ټرمپ او د نوموړي په کابینه کې د اغېزمنتوب ادارې د مشر اېلن ماسک له خوا د دولتي لګښتونو د کمولو او د بودیجې د سپما په موخه دا ځل لسګونه زره روغتیایي کارکوونکي له دندو رخصت او پر کورونو کېنول شوي دي.
ویل کیږي چې دا کسان د (لګښتونو د کمولو پروګرام) د پلې کولو په ترڅ کې له دندو ګوښه شوي.
د رويټرز خبري اژانس د راپور لهمخې دا کارکوونکي د امریکا د روغتیا او بشري خدماتو وزارت تر چتر لاندې د مهمو ادارو برخه وو.
ډونالډ ټرمپ له دې وړاندې د پوهنې وزارت فاسد یاد کړی و او د یاد وزارت چارې یې ځنډولې وې. همدارنګه ویل کیږي چې ښایي نوموړی دا ځل د دفاع وزارت زرګونه تنه له دندو ګوښه کړي.