د احصايې او معلوماتو ملي اداره وايي، چې د تېرې کال په کب مياشت کې د امريکايي ډالرو پر وړاندې د افغانيو په ارزښت کې ۳.۱ سلنه ډېروالی راغلی دی.
د يادې ادارې وياند محمد حليم رافع په خپله اېکس پاڼه ليکلي، د ياد کال په کب مياشت کې د امريکايي ډالرو پر وړاندې د افغانۍ ارزښت ۷۲.۴ افغانۍ او سلواغې مياشت کې ۷۴.۷ افغانۍ و، چې د دې مياشتې په پرتله يې په ارزښت کې ۳.۱ ډېروالی راغلی دی.
د نوموړی په وينا، چې د تېر کال په کب میاشت کې د خوراکي توکو په بیو کې هم ۰٫۲ سلنه ټیټوالی راغلی دی.
د احصايې او معلوماتو ملي ادارې د خبر له مخې، دا ټیټوالی ۵٫۶ سلنه د غلو دانو، ۵٫۹ سلنه د غوړیو او ۳٫۱ سلنه د بېلابېلو سبزیو په بیو کې دی.
دغه راز د غیرخوراکي توکو په بیو کې ۰٫۷ سلنه ټیټوالی ښکاري، چې ۴٫۴ سلنه یې د جامو او البسې شاخص او ۲٫۴ سلنه د کور سامان شاخص په بیو کې ټیټوالی راغلی دی. د افغانۍ ارزښت لوړېدل او د خوړو بیو راټیټېدل، دواړه هغه شاخصونه دي، چې د بازار د وضعیت ښه والی ترې څرګندېږي.