د ننګرهار د مرستيال والي مولوي عزيزالله مصطفی په مشرۍ یوه لوړپوړي ولايتي پلاوي د تورخم فرضي کرښې ته سفر کړی او له پاکستانه د راستنېدونکو کډوالو د دویمې څپې څارنه یې کړې ده.
مرستیال والي په دغه سفر کې د ادارو ترمنځ پر همغږۍ، شته زيربناوو ته پر پاملرنې او د اړوندو مؤسسو له خوا د مرستو د رسولو پر چټکتيا ټينګار کړی دی. نوموړي همدارنګه فرضي کرښه کې د لومړنیو اړتیاوو، عمري کمپ کې پر لنډمهالې مېشتېدنې، خوړو، روغتیا، پاکو اوبو، ټرانسپورټ او نورو برخو کې د پوره امکاناتو ډاډ ورکړی دی.
په تورخم کې راستنو شويو هېوادوالو خپلې خاورې ته په راتګ او دلته په شته امکاناتو خوښي ښودلې ده. همدارنګه دې کډوالو اندېښنه څرګنده کړې چې پاکستان کې ګڼې کورنۍ په زور اېستل کیږي، یا ترې د کورنۍ غړي جلا کیږي او یا یې هم مالونه لوټل کیږي.
د یادونې وړ ده چې د تېرې ورځې راهیسې له پاکستانه شاوخوا ۳۰۰ کورنۍ خپل هېواد ته راستنې شوي دي.