د ملګرو ملتونو کارپوهانو په یوه اعلامیه کې په زوره له پاکستان څخه د افغان کډوالو ایستل د بشري او د کډوالۍ د نړیوالو قوانینو خلاف کړنه بللې او ټینګار یې کړی، چې پاکستان دې د یوه ګاونډي هېواد په توګه د افغان کډوالو منلو ته لا هم دوام ورکړي.
ورته وخت کې د ملګرو ملتونو د بشري حقونو ځانګړي راپور ورکوونکي «ریچارډ بنت» هم پاکستان کې د افغان کډوالو د نیولو او د جبري ایستلو لړۍ د درولو غوښتنه کړې ده.
د کډوالو او بېرته راستنېدونکو چارو وزارت ویاند مفتي عبدالمطلب حقاني هم د یادو کارپوهانو د دغې غوښتنې هرکلی کړی او د ملګرو ملتونو سازمان څخه یې غوښتي، چې پاکستان کې د افغان کډوالو د حقونو د پایمالولو مخنیوی دې وشي.
اسلامي امارت د افغان کډوالو جبري او ډله ییزه شړنه غندلې ده.