د غزني د ټولګټو ریاست مسوولین وایي، د یاد ولایت په مقر ولسوالۍ کې د کابل – کندهار عمومي سړک د دواړو غاړو (شولډر) جوړول پیل شوي دي.
د دغه ولایت د ټولګټو رییس، مولوي عبدالقدیر بلال رسنیو ته ویلي چې په دې پروژه نږدې ۲۰۰ میلیون افغانۍ لګښت راځي او د رغولو چارې به یې په یو کال کې بشپړې شي.
مولوي بلال همداراز ویلي چې دا پروژه یو خصوصي شرکت ته په قرارداد ورکړل شوې او د رغولو کار یې پرون په «مقر» ولسوالۍ کې پیل شوی دی.
د غزني د ټولګټو ریاست د مسوولینو په وینا چې په دې پروژه کې ‘یونیم – یونیم متر سور سره’ د ۹۶ کیلو متره سړک د «شولډر» برخې رغول شامل دي او ۱۹۸ میلیون افغانۍ لګښت پرې راځي.
د ویلو ده چې دا مهال له کابل څخه تر غزني پورې د کابل – کندهار لویې لارې د دویم لین سړک د جوړولو چارې هم په چټکۍ پیل شوې دي.