کدو، چې ډېر خلک یې یوازې د سترګو لپاره ګټور ګڼي، په حقیقت کې یو له هغو طبیعي نعمتونو څخه دی چې له بدن سره بېشمېره روغتیايي مرستې کوي. وروستیو علمي څېړنو ثابته کړې ده چې دا ساده سبزی، نه یوازې د سترګو، بلکې د پوستکي، وجودي دفاع، سرطان، وزن او حتا د حامله مېرمنو لپاره حیرانوونکې ګټې لري. دلته به د کدو له پنځو بنسټیزو ګټو سره، نورې حیرانوونکې ګټې هم در وپېژنو.
۱– د وزن د کمښت
کدو یو له هغو سبزیجاتو څخه دی چې هم لږ کالوري لري او هم زیاته اندازه فایبر. دا مواد د هاضمې سیستم چټکوي، د وږې احساس کموي او د وزن په کنټرول کې مهم رول لوبوي. یو قاب پوخ شوی کدو نږدې ۷ ګرامه فایبر لري. همداراز، کدو د پوتاشیم بډایه سرچینه ده، چې له بدن څخه اضافي اوبه او مالګې بهر باسي او له پړسوب څخه مو ژغوري.
۲– د بدن دفاعي نظام ځواکمنوونکی
کدو د ویټامین اې، فولیټ، ریبوفلاوېن، فایبر او انټياکسیدنټونو لرونکی دی، چې د بدن دفاعي حجرو ته انرژي ورکوي. حلکېدونکی فایبر د وجود دننه التهاب کموي، او فولیټ د DNA د جوړښت لپاره اساسي ارزښت لري. دا مواد ټول یوځای د ناروغیو په وړاندې د بدن د مبارزې وړتیا پیاوړې کوي.
۳– د مخ پوستکی ځوان ساتي
که غواړئ چې پوست مو نرم، ځوان او ښایسته پاتې شي، نو کدو مه هېروئ. په کدو کې شته بیټاـکیروټین، ویټامین سي، اي، او B5 د پوستکي له ګونځو مخنیوی کوي، کولیجن زیاتوي او له لمر، عمر او وچوالي سره مقابله کوي. دا خواړه د ښځو او نارینه وو دواړو د ښکلا پټ ملګری ګڼل کېږي.
۴– د سرطان خطر کموي
کدو له طبیعي انټياکسیدنټونو بډای دی، لکه بیټاـکیروټین چې په بدن کې د ویټامین اې په بڼه فعاله کېږي. دا ویټامین د سرطان ضد خاصیت لري او حجرات د زیانمنو رادیکالونو له اثره ژغوري. همداراز، د کدو تخمونه یو ډول طبیعي فیتوـاستروجن تولیدوي، چې د سینې د سرطان د مخنیوي وړتیا لري، په تېره بیا د ښځو لپاره ډېر مهم ګڼل کېږي.
۵– د حامله مېرمنو پیاوړی ملاتړی
د کدو بډایه ترکیب حامله مېرمنو ته خورا ارزښتناک ګڼل کېږي. پکې شته پروټین، کاربوهایډریټ، فولات، کلسیم، اوسپنه او ویټامینونه د جنین د سالمې ودې او دماغي پرمختګ لپاره اړین دي. سربېره پر دې، د فاسفورس او کلسیم شتون د هډوکو پیاوړتیا تضمینوي.
۶– د زړه روغتیا ته ګټور دي
کدو د فایبر، مګنیزیم او انټياکسیدنټونو غني منبع ده، چې د زړه د حملې او لوړ فشار خطر کموي. دا مواد د شریانونو دیوالونه نرم ساتي، د وینې جریان تنظیموي، او بدن ته ارام ور بښي.
۷– د سترګو د بینا ساتونکی
که څه هم دا ګټه مشهوره ده، خو اوس ثابته شوې چې کدو د شپې نابینایي، سترګو وچوالي، او د سترګو د عمر اړوند ناروغیو په مخنیوي کې لویه مرسته کوي. د ویټامین A، بیټاـکیروټین، او زنک لرل دا خواړه د سترګو د بینا پیاوړتیا لپاره ځانګړی کړي دي
کدو، دا ساده خوړنیز توکی، نه یوازې یو خوندوره سبزي ده، بلکې د بدن د روغتیا ساتلو یوه طبیعي نسخه هم ده. له وزن کمونې نیولې، تر دفاعي سیسټم، سرطان، پوستکي، زړه، سترګو، او د حامله مېرمنو لپاره ګټې یې باید هر کورنۍ په خپله ورځنۍ خوړنیزه تګلاره کې شامل کړي.