د خوست مسوولین وایي چې د «غورځنګ» په نوم ډاکتر د یاد ولایت د استخباراتي ځواکونو د ځانګړو عملیاتو پرمهال د انسانتښتوونکو له منګلو ژغورل شوی دی.
د خوست ولایت مقام ویاند، مستغفر ګربز په اېکسپاڼه لیکلي چې دا کس درې ورځې مخکې د ننګرهار، مرکز جلال آباد ښار څخه تښتول شوی و او له کورنۍ یې د خلاصون په بدل کې ٧ سوه زره امریکایي ډالر غوښتل شوي وو.
سرچینې لیکلي چې یاد کس نن ورځ د خوست ولایت د استخباراتو رياست ځواکونو د يو لړ کشفي عملیاتو پهٔ ترڅ کې د ياد ولايت ببرک تاڼې اړوند خاني غرئيزه سيمه کې د انسانتښتوونکو له منګلو ژغورلی دی.
مستغفر ګربز دا هم ویلي چې ډاکتر غورځنګ د مسوولینو له لوري د یو لړ مراسمو په ترڅ کې د هغه کورنۍ ته سپارل شوی او په دې تړاو څلور کسان له یو فیلډر موټر او یوې تپانچې سره نیول شوي دي.
له ننګرهاره تښتولشوی ډاکتر په خوست کې ژغورل شوی
