لوګر کې د سرحدونو، قومونو او قبایلو چارو وزارت د مسوولینو له لوري د «اسلامي نظام بقا او د ولسونو هوساینه» په نوم پراخه ولسي غونډه کې مسوولینو او قومي مشرانو پر بېلابېلو مسایلو خبرې کړې دي.
د یاد وزارت د خبرپاڼې له مخې، په دې غونډه کې د لوګر مسوولینو ویلي چې اوس د یووالي او پرمختګ وخت دی، او د سولې له دې فرصته یې پر ګټېاخیستنې ټینګار کړی.
بلخوا قومي مشرانو په خپلو خبرو کې اسلامي نظام ته د ژمنتیا څرګندولو ترڅنګ ویلي چې په دې خاوره کې به هېڅکله د بل چا واک ته اجازه ورنکړي.
دوی همداراز له اسلامي امارت څخه غوښتي چې د ځوانانو له استعدادونو ګټه واخلي او د کارکولو زمېنه ورته برابره کړي.
د سرحدونو، قومونو او قبایلو چارو وزارت په خبرپاڼه کې دا هم ویل شوي چې په غونډه کې د یاد وزارت د جرګو او قبایلو چارو د مرستيال، مولوي محمد علي جان احمد خلکو ته ډاډ ورکړی چې ستونزې به يې د حل په موخه له لوړ رتبه مشرانو سره شريکې کړي.
د ویلو ده چې په دې غونډه کې همداراز د انساني قاچاق پر مخنیوي هم خبرې شوې او همداراز اسلامي شریعت ته پر ژمنتیا ټینګار شوی دی.
لوګر کې پراخه ولسي غونډه؛ قومي مشرانو اسلامي نظام ته پر ژمنتیا ټینګار کړی
